2024-жылы Кыргызстан тышкы карызыдын 400 миллион долларын төлөйт
«Учурда биз тышкы карыз боюнча төлөмдөрдүн туу чокусунда турабыз», — деди министрлер кабинетинин төрагасы Акылбек Жапаров Ош шаардык мэриясынын коллегиясында.
Анын айтымында, 2030-жылга чейин чоң суммалар төлөнөт: 2023-жылы 344 миллион доллар, 2024-жылы 400 миллион, 2025-жылы 430 миллион, 2026-жылы 390 миллион доллар.
«Биз баарыбыз «Кыргызстан» деген бир кайыктабыз, андыктан бизге эмгек жана ар бир адамдын салымы керек. Биз бир команда болуп иштешибиз керек», — деди Акылбек Жапаров.
Өткөн жылдын ноябрь айынын жыйынтыгы боюнча Кыргызстандын мамлекеттик карызы (тышкы жана ички) 6 миллиард 115,99 миллион долларды (544 миллиард 550,43 миллион сом) түзгөн. 4 миллиард 545,11 миллион доллар (404 миллиард 683,78 миллион сом) — тышкы карыз, 1 миллиард 570,88 миллион доллар (139 миллиард 866,65 миллион сом) — ички карыз.
