11:09, 23 января 2024, 24.kg
Бишкек — Нарын — Торугарт жолунда жер титирөөдөн улам кулаган таштар тазаланды
Бишкек — Нарын — Торугарт унаа жолунун 410-чакырымында жер титирөөдөн улам тоо боорунан кулаган топурак, таштар тазаланды. Бул тууралуу Транспорт жана коммуникациялар министрлиги билдирди.
Маалыматка ылайык, № 957 жол тейлөө ишканасынын кызматкерлери унаа кыймылына тоскоолдук жараткан таштарды тазалап, жумуштар түнкү саат 2:20да жыйынтыкталды.
Өлкөнүн башка унаа жолдорунда мындай көрүнүштөр катталган жок.
Бүгүн түнкү саат 00:09да Кытай Эл Республикасынын аймагында күчү 8 баллга жеткен жер титирөө катталды. Жалпысынан алты жолу жер силкинип, алардын бары Кыргызстанда дагы сезилди.
0
