Камчы Көлбаевдин кылмыштуу кирешелерин мыйзамдаштырууга шектүү жаран кармалды
Камчыбек Асанбектин (Көлбаевдин) кылмыштуу кирешелерин мыйзамдаштырууга шектүү жаран кармалды. Бул тууралуу УКМКнын басма сөз кызматы билдирди.
Маалыматка караганда, 2024-жылдын 8-январында Кылмыш-жаза кодексинин 222-беренесине ылайык (кылмыштуу кирешелерди легализациялоо (адалдоо) В.Р.Г. аттуу жараны кармалды.
«Аталган В.Р.Г. Камчыбек Асанбектин кылмыштуу аракеттерин билип, 2016-жылдан бери кылмыш жолу менен табылган акча каражаттарын мыйзамдуу деп көрсөтүү менен алектенип, ошондой эле Камчыбек Асанбекке таандык болгон төмөнкү ири объектилердин курулушуна биргелешип катышкан: «Березка» мончо комплекси, «Барс» эс алуу борбору, «Каганат Резорт» эс алуу борбору, Чолпон-Ата шаарындагы «Ордо» соода борбору, ошондой эле «Сейил» шаарчасындагы коттедждер», — деп белгиледи УКМК.
Шектүү убактылуу кармоочу жайына киргизилди.
Учурда УКМК тарабынан Камчыбек Көлбаевге тиешелүү мүлктөрдү аныктоо жана мамлекетке кайтаруу боюнча тиешелүү ыкчам-тергөө иш-чаралары улантылууда.
