12:02, 18 декабря 2023, 24.kg
Бишкекте кыз ала качууга шектүүлөр аныкталып, убактылуу кармоо жайына киргизилди
Бишкек шаарында кыз ала качууга шектүүлөр кармалды. Бул тууралуу Биринчи Май ички иштер башкармалыгынын басма сөз кызматы билдирди.
Маалыматка ылайык, милицияга Т.Ж. аттуу жаран арыз менен кайрылган. Ал Чыңгыз Айтматов проспектиси менен Горький көчөсүнүн кесилишинде анын синдисин белгисиз жарандар күч колдонуп унаага салып кетишкенин билдирген.
Кылмыш-жаза кодексинин 172-беренесине (никеге туруу максатында адамды уурдоо) ылайык кылмыш иши козголгон.
Ыкчам кызматкерлер тарабынан борбор калаанын аймагында шектүүлөр аныкталып, кармалды. Алар убактылуу кармоочу жайына киргизилди.
Тергөө иштери уланууда.
0
