Кургак учук жана ВИЧти дарылоо үчүн Кыргызстанга жылына 500 миллион сомдой керек
Эгерде Глобалдык фонд каржылоону токтотсо, кургак учукту жана ВИЧти дарылоо үчүн бюджеттен жылына 400-500 миллион сом бөлүнүшү керек. Бул тууралуу Бүткүл дүйнөлүк СПИДге каршы күрөшүү күнүнө арналган жыйында «Партнерская сеть» Саламаттык сактоо программалар ассоциациясынын директору Айбар Султангазиев билдирди.
Анын айтымында, бул каражатка дары-дармектер, тесттер жана реагенттер сатылып алынат.
«Кийинки жумада Глобалдык фонддун аймактык менеджери келет. 5-декабрдан 8-декабрга чейин келишимге кол коюлабы же жокпу чечилет. Эгер коюлбаса, анда өлкө жаңы арыз бериши керек», — деди Айбар Султангазиев.
Ал 2025-жылга карата дарылоону каржылоого олуттуу коркунуч бар экенин белгиледи.
Белгилей кетсек, сентябрь айында Глобалдык фонд СПИД менен күрөшүү үчүн каржылоону токтоткону белгилүү болгон. Себеби Женевадагы Глобалдык фонддун 2024-2026-жылдарга карата өлкөлөрдүн өтүнмөлөрүн талкуулоо боюнча жыйынына Кыргызстандын мамлекеттик түзүмдөрүнүн өкүлдөрү барбай калган. Фонддун аймактык менеджери Димитру Латичевский Кыргызстандын арызы боюнча сүйлөшүүлөр токтотулганын билдирген. Ага чейин Глобалдык фонд 2026-жылга чейин өлкө үчүн 27,8 миллион доллар акча бөлүүнү колдогон болчу.
