Жалал-Абадда жаранды мыйзамсыз кармап, акча опузалашкан. Шектүүлөр кармалды
Жалал-Абад облусунун Сузак районунда адамды тоноого жана эркиндигинен мыйзамсыз ажыратууга шектелген жарандар кармалды. Бул тууралуу ИИМдин басма сөз кызматы кабарлады.
Маалыматка ылайык, 16-августта Ош облусунун К. уулу Т. аттуу тургуну арыз менен кайрылган. Ал 7-августтан 8-августка караган түнү Жалал-Абад облусунун Сузак районунда төрт бала аны уруп, күч колдонуп автоунаага салып, 3500 сом акчасын тартып алышканын билдирген. Андан соң 13-августка чейин бейтааныш үйдө мыйзамсыз коркутуп, акча талап кылуу менен ур-токмокко алышкан.
Аталган факт каттоого алынып, Кылмыш-жаза кодексинин 169-беренеси (Эркиндигинен мыйзамсыз ажыратуу) жана 206-берененин (Тоноо) негизинде кылмыш иши козголгон.
Кылмышка шектүү катары Жала-Абад облусунун тургундары 21 жаштагы С.Б., 24 жаштагы М. уулу А. жана 23 жаштагы А.А. кармалып, убактылуу кармоочу жайына киргизилди.
Учурда кармалган жарандардын башка кылмыштарга тиешеси бар же жоктугу текшерилүүдө.
