Депутат Дүйшөн Төрөкулов абактан чыгып, Жогорку Кеңештин жыйынына келди
Жогорку Кеңештин коррупцияга шектелип кармалган депутаты Дүйшөн Төрөкулов парламенттин бүгүнкү, 11-марттагы жыйынына катышууда.
Ал Биринчи Май райондук сотунун чечими менен кечээ, 10-мартта үй камагына чыккан.
Жогорку Кеңеште бүгүн Конституциянын жаңы долбоору боюнча референдум дайындоо тууралуу мыйзамга экинчи жана үчүнчү окууда добуш бериши күтүлүүдө.
Мыйзам долбоору 3-мартта биринчи окууда кабыл алынган. Макул деген добушун бергендер арасында жыйынга катышпагандар, арасында тергөө абагында жаткан Төрөкулов да бар экени белгилүү болгон.
Дүйшөн Төрөкулов коррупцияга шек саналып 15-январда кармалган. Сот анын бөгөт чарасын карап, эки айга камакка алган. Депутат Улуттук коопсуздук боюнча мамлекеттик комитеттин (УКМК) тергөө абагында отурган.
Ал абактан боштулганы тууралуу расмий маалымат бериле элек болчу.
