Министрлик кыргызстандыктардан коронавирустан улам дүрбөлөңгө түшпөөнү суранат
Саламаттык сактоо министрлиги кыргызстандыктардан Кытайдагы коронавирустан улам дүрбөлөңгө түшпөөнү суранат. Бул тууралуу маалымат жыйында Коомдук саламаттык сактоо башкармалыгынын жетекчиси Айнура Акматова билдирди.
Ал 2019-жылдын декабрынын акырында Кытайда коронавирус боюнча жагдай татаалдашып кеткенин эскертти.
«Ушуга байланыштуу Саламаттык сактоо министрлиги санитардык-эпидемиологиялык чараларды күчөттү. Чек арадагы өткөрүү пункттарында санитардык-эпидемиологиялык кызматтын адистери күчөтүлгөн тартипте иштеп жатышат. Вирустун белгилерин эрте аныктай турган жабдыктар коюлду, чек арадан өткөн жарандар сурамжылоодон өтүүдө», — деди Айнура Акматова.
Кытайдын Гигиена жана саламаттык сактоо боюнча мамлекеттик комитеттин жетекчисинин орун басары Ли Бин 22-январда соңку маалыматтарды айтып, каза болгондордун саны тогуз, ооруну жугузуп алгандар 440 киши экенин расмий билдирди.
