Кой-Таш окуясы. Иликтөө иштери аяктоо алдында турат
7-8-августтагы Кой-Таш окуясы боюнча иликтөө иштери аяктоо алдында турат. Бул тууралуу 24.kg агенттигине депутат Ирина Карамушкина билдирди.
Анын айтымында, тергөө шектүүлөргө экспертизанын жыйынтыктарын тааныштырып, жүздөштүрүп жатат.
«Мени Кой-Таш окуясына чейин жана окуя маалында болгон айрым кишилер менен беттештиришти. Иликтөө аяктап жатат. Жакынкы күндөрү бизге айыптоочу актыны берип, ишти сотко өткөрүүгө аракет кылгандары маалым. Бирок коргоочу тарап өзүнүн өтүнүчүн чыгара элек. Иште дал келбөөчүлүктөр бар. Алмазбек Атамбаевдин үйүндө тынчтык жолугушуулары, тематикалык кечелер өткөрүлгөн. Митингдер тууралуу айтсам, ал биздин конституциялык укугубуз», — деди Ирина Карамушкина.
Эске салсак, Алмазбек Атамбаев кармалгандан кийин премьер-министр Кой-Таш окуясын иликтөө боюнча атайын комиссия түзгөн. Анын курамына вице-премьер-министр Жеңиш Разаков, депутаттар, өкмөттүн өкүлдөрү, коомдук ишмерлер жана эксперттер кирген.
