Райым же ырайымдуулук. Президентке тандоо мүмкүнчүлүгү берилди
Бишкектеги Масим Горький атындагы гүлбакчада Садыр Жапаровду колдоо максатында тынчтык митинги уланууда.
Алар мурунку депутатка ырайым кылууну талап кылышууда.
«Президент бүгүн Райымды же ырайымдуулукту тандашы керек. Анткени жактоочу Садыр Жапаровдун баардык документтерин президентке тапшырды. Бизде үмүт бар. Саясий туткун делген Текебаев, Чотонов, Талгарбеков жана анын командасына, Бектур Асановго, Кубан Кадыровго мунапыс берилди. Ал эми Жапаровго эмнегедир мунапыс бербей жатышат. Бул кандайдыр бир саясий чечим деп ойлоп жатам», — дейт жарандык активист Мелис Аспеков.
Мурунку депутат Садыр Жапаровду эркиндикке чыгаруу үчүн 500 миң кол топтолгонун 24.kg агенттигине жарандык активист Мелис Аспеков билдирген. Анын айтымында, мурунку депутаттын тарапташтары миллион кол чогултуп, андан кийин президент Сооронбай Жээнбековго берүүнү пландап жатышат. Мындан сырткары Садыр Жапаровдун жактоочулары ырайым берүү боюнча комиссиянын кароосуна жиберүү үчүн документтерди топтошууда.
Кумтөр маселесине байланыштуу өкмөткө каршы чакырыктары менен чыгып жүргөн Садыр Жапаров 2013-жылы «Караколдо митинг уюштуруп, Ысык-Көлдүн ошол кездеги губернатору Эмилбек Каптагаевди барымтага алган» деген айыптын негизинде 2017-жылдын мартында камакка алынган. 2018-жылы июнь айында экс-депутат 11 жыл алты айга кесилген. Быйыл апрелде Жогорку сот анын жаза мөөнөтүн 1,5 жылга кыскартып, он жылын калтырган.
