Бишкек шаардык соту Алмазбек Атамбаевдин кармалышын мыйзамдуу деп тапты
Бишкек шаардык соту мурунку президент Алмазбек Атамбаевдин кармалышын мыйзамдуу деп тапты. Отурумдун жүрүшүндө жактоочулар тергөөчүлөрдүн аракетин мыйзамсыз деп табууну суранышкан. Соттук коллегия өтүнүчтү канааттандырган жок.
Жактоочу Сергей Слесаревдун айтымында, мурунку президентти 26-октябрга чейин камакта калтыруу чечими өзгөргөн жок.
Эске салсак, УКМКнын атайын кызматы 7-августта Алмазбек Атамбаевдин Кой-Таштагы үйүн басып алууга аракет кылган. Бирок, операция ийгиликсиз болгон. Башаламандык маалында 45 киши жаракат алган. «Альфанын» кызматкери октон каза тапкан.
8-августта атайын операцияны ИИМдин атайын бөлүмчөсү колго алган, жыйынтыгында мурунку президент багынып берди. Ал УКМКнын тергөө абагына 26-октябрга чейин камакка алынды. Алмазбек Атамбаевге укук коргоо органдарына карата зомбулук көрсөтүү, адам өлтүрүү, барымтага алуу, массалык башаламандык уюштуруу, жемкорлук айыбы тагылууда.
