Атамбаевдин иши. Мечиттин ишмердүүлүгү чектелген жок
Бишкектеги «7-апрель шейиттери» мечити камакка алынган жок. Бул тууралуу Башкы прокуратурадан билдиришти.
Көзөмөлдөө органынан маалымдашкандай, «Форум» Илимий-өндүрүштүк фирма" ЖЧКсына катталган жер аянтын камакка алышты. Компания Алмазбек Атамбаевге таандык. «Мечиттин ишмердүүлүгү чектелген жок. Тергөө болгону мурунку президент Алмазбек Атамбаев аны кайсыл каражатка курганын аныктап чыгат», -деп билдиришти Башкы прокуратурадан.
«7-апрель шейиттери» мечити быйыл апрелде ачылган. Алмазбек Атамбаев мечиттин курулушуна достору жардам бергенин айткан.
Эске салсак, УКМКнын атайын кызматы 7-августта Алмазбек Атамбаевдин Кой-Таштагы үйүн басып алууга аракет кылган. Бирок, операция ийгиликсиз болгон. Башаламандык маалында 45 киши жаракат алган. «Альфанын» кызматкери октон каза тапкан.
8-августта атайын операцияны ИИМдин атайын бөлүмчөсү колго алган, жыйынтыгында мурунку президент багынып берди. Ал УКМКнын тергөө абагына 26-октябрга чейин камакка алынды. Алмазбек Атамбаевге укук коргоо органдарына карата зомбулук көрсөтүү, адам өлтүрүү, барымтага алуу, массалык башаламандык уюштуруу, жемкорлук айыбы тагылууда.
