Садыр Жапаровдун уулу жол кырсыгынан каза тапты
Экс-депутат Садыр Жапаровдун улуу баласы Дастан жол кырсыгында каза болду. Маалыматты 24.kg агенттигине жактоочу Шерабидин Токтосунов тастыктады.
Маалыматка ылайык, 27 жаштагы Дастан Ысык-Көлдөн келе жаткан. Кырсык 22-августта болгон. «Ал өзүнө келбей каза болду, атасына кабар бериле элек», -деди юрист.
Ал ЖАМКка Садыр Жапаровду уулуна топурак салууга бошотуу тууралуу өтүнүч менен кайрыла турганын айтты.
Ысык-Көл ОИИББ кырсык тууралуу маалыматты кечирээк бере турганын айтышты.
Кумтөр маселесине байланыштуу өкмөткө каршы чакырыктары менен чыгып жүргөн Садыр Жапаров 2013-жылы «Караколдо митинг уюштуруп, Ысык-Көлдүн ошол кездеги губернатору Эмилбек Каптагаевди барымтага алган» деген айыптын негизинде 2017-жылдын мартында камакка алынган. 2018-жылы июнь айында экс-депутат 11 жыл алты айга кесилген. Быйыл апрелде Жогорку сот анын жаза мөөнөтүн 1,5 жылга кыскартып, он жылын калтырган.
