Бишкек ШИИББ: Икрамидин Айткуловдун уулу дагы алдамчылыкка шектелүүдө
Бишкек ШИИББ камакка алынган жактоочу Икрамидин Айткуловдун уулуна карата «Алдамчылык» беренеси боюнча сотко чейинки өндүрүш башталганын билдирди.
Маалыматка ылайык, 24-январда Башкы прокуратурага Б.Т. аттуу жаран кайрылып, Азамат Айткулов 2014-жылдын апрелинде атасынын дарылануусуна деп 25 миң доллар алганын айткан. Анда насыялык келишим түзүшкөн. 3 айдан кийин шектүү ишкерликти өнүктүрөм деп карызга 6 миң доллар дагы алган.
ШИИББнын маалыматына таянсак, 2014-жылдын акырында Икрамидин Айткулов уулунун карыз милдетин өзүнө алган. 2015-жылы ал арыз ээси менен насыялык келишимге кол коюшкан. Бирок, арыздануучу карызды дагы деле ала элегин билдирди.
«Материал Кылмыштардын жана жоруктардын бирдиктүү реестрине катталды. Иликтөөнүн жүрүшүндө 2015-жылы Азамат Айткулов дагы бир алдамчылык фактысы менен соттолгону анык болду», -деп айтылат билдирүүдө.
Эске салсак, кечээ Адвокат Икрамидин Айткулов алдамчылыкка шектелип кармалган болчу.
