Раиса Атамбаева тинтүү жана банктык эсептин камакка алынышы тууралуу айтып берди
Милиция мурунку президент Алмазбек Атамбаевдин уулу Сейитбек Атамбаевдин кайын атасынын үйүн тинтүүгө алышты. Бул тууралуу Раиса Атамбаева журналисттерге айтты.
Анын билдирүүсүндө, Кой-Таш окуясынан кийин дароо 10 милиция Алмазбек Атамбаевдин кудасынын үйүнө барып тинтишкен.
«Ал жактан эмне издешкен, белгисиз. Балким кандайдыр бир каражат издешкендир. Мындан тышкары «Ала-Арчадагы» биздин үйгө мөөр басылган. Өз буюмдарымды ала албай жатам. Ал үй мамлекеттик бюджеттен эмес, үй-бүлөлүк каражаттан курулган. Балким Кой-Таштагы үйдү дагы мөөр басып бекитип коюшат», -деди Раиса Атамбаева.
Ал кошумчалагандай, тергөө органдары 2012-жылы ачылган банктык эсебин камакка алышкан. Ошондой эле Раиса Атамбаеванын айлыгы салынып турган банктык эсеп камакка алынган.
