Түркия кыргызстандык мигранттардын пенсиялык салымдарын өз мекенине которот
Түркия кыргызстандык мигранттардын пенсиялык салымдарын өз мекенине которот. Бул тууралуу эл аралык иштер, коргонуу жана коопсуздук боюнча парламенттик комитеттин отурумунда Социалдык фонддун төрагасы Медер Ирсалиев билдирди.
Эки өлкөнүн өкмөттөрү ортосунда ушул жылдын 9-апрелинде Анкарада социалдык камсыздоо тууралуу макулдашууга кол коюлган. Документке ылайык, өлкөлөр мигранттардын эмгек стажын таанып, ким аталган аймакта расмий түрдө иштеген болсо аларга пенсиялык салымдар төлөнүп берилет.
«Эгерде Кыргызстандын жараны Туркияда 15 жыл иштеген болсо, ал пенсия курагына келгенде пенсия ала баштайт. Түркия анын пенсиясын Кыргызстанга которот. Ошондой эле, ал жаран бул жактан дагы стажына жараша пенсия алууга талапкер боло алат», -деди Медер Ирсалиев.
«Бул жакта иштеген Түркиянын жарандары дагы пенсияга чыга алышат. Болжолдуу эсеп боюнча, Кыргызстан Түркияга жылына 10 миллион сом которуп турмакчы», -деди Медер Ирсалиев.
