Наманганда окуучу кыз төрөп, эс алуудагы мугалимдер жумушка чакырылды
Өзбекстандын Наманган облусунун Чартак районунда 7-класстын окуучусу төрөгөндүгү тууралуу маалыматтан кийин райондук билим берүү башкармалыгы эс алуудагы мугалимдерди мөөнөтүнөн мурда жумушка чакырды.
Мекеменин жетекчиси Шохиста Тургунова окуучу кыз төрөгөндүгүн четке кагып, бирок айрым мугалимдер жумушка чакырылганын ырастады.
Мугалимдер болсо окуучулардын үйлөрүн кыдырып, болгон окуя тууралуу ата-энелерге маалымат берип, балдарына көзөмөлдү күчөтүү керектигин эскертип жаткандыктарын айтышууда.
«Эгер кыздар эрезеге жеткен болсо, аларды УЗИге алып барып жатабыз. Ата-энелер менен сүйлөшкөндөн кийин ортодогу маектин мазмунун кагазга жазып, окуучулар жана алардын ата-энелери менен сүрөткө түшөбүз. Анан аларды отчет катары топтоп, мектеп жетекчилигине тапшырабыз. Ал жактан райондук билим берүү бөлүмүнө жөнөтүлөт», — деди мугалимдердин бири.
«Учурда бул факты боюнча ыкчам-иликтөө иштери жүрүүдө. Бул ишке тиешеси барлардан ДНК анализдер алынып жатат. Азырынча башка маалыматтар айтылбайт», — деди ал.
