08:42, 02 июля 2018, 24.kg
Казакстан виза берүү тартибин жеңилдетүүдө
Астана чет өлкөлүктөргө виза берүү тартиптерин жеңилдетүүдө. Бул тууралуу өлкөнүн Ички иштер министрлиги билдирди.
«Казакстанга келе турган чет өлкөлүктөргө чакыруу берүү мөөнөтү кыскартылды. Эми чакыруу — виза ала турган адамдын Казакстанга келээрине беш иш күн калгандан кеч эмес берилиши керек. Буга чейинки мөөнөт 14 күндү түзчү», — деп жазылган ИИМдин билдирүүсүндө.
Маалыматка караганда, эрежелерге киргизилген тиешелүү өзгөртүүлөр 1-июлдан тарта күчүнө кирет.
Мекемеден белгилешкендей, визасы бар чет өлкөлүктөр миграция органдарына каттоого туруудан бошотулат. Анткени алардын жашай турган жана жүрө турган жерлери чакыруу кагаздарында жазылуу болот.
0
