Жетөө биригип бирөөнү сабады. Кыз менен таанышууга келген жигит токмоктолду
Ош облусуна караштуу Өзгөн районунда кыз менен таанышууга келген жигитти 7 бала сабап салды. Бул тууралуу «24.kg» агенттигине РИИБдан билдиришти.
Маалыматка караганда, жабырлануучу милицияга арыз менен кайрылып, аны 7 бала сабап салганын айткан.
Окуя 10-июнда катталды. Аталган факт боюнча Кылмыш-жаза кодексинин 234-беренеси (бейбаштык) менен кылмыш иши козголду. Учурда шектүү катары 2 адам кармалып, калганынын аты-жөнүн тактоо иштери жүргүзүлүүдө.
Эскерте кетсек, ушуга окшогон окуя буга чейин март айында Ноокат районунун Гүлстан айылында катталган. Анда айылдыктар кыз-жигитти ур-токмокко алып, алардын ден соолугуна зыян кетирилген. Ал окуядан көп өтпөй аталган айылга кыз менен жолугуу үчүн келген 32 жаштагы адам дагы сабалып, ал алган жаракатынан улам көз жумган.
