7-апрелге арналган иш-чараларга президент Роза Отунбаеваны чакырды
7-апрелде президент Сооронбай Жээнбеков 2010-жылдагы апрель окуясында курман болгондорду эскерүү иш-чараларына катышат. Бул тууралуу мамлекет башчынын басма сөз кызматы билдирди.
Жээнбеков «Ата-Бейит» мемориалдык комплексиндеги мемориалдык дубалынын таманына гүл коет.
Иш-чарага өлкөнүн экс-президенттери Алмазбек Атамбаев жана Роза Отунбаева дагы чакырылган.
Андан тышкары 2010-жылы 7-апрелде курман болгондордун жана жабыркагандардын туугандары, Апрель окуяларынын катышуучулары, Жогорку Кенештин депутаттары, өкмөт мүчөлөрү, Кыргыз Республикасынын башка мамлекеттик органдарынын жетекчилери жана коомчулук өкүлдөр катышат.
Ошол эле күнү президент 2002-жылы Аксы окуяларынын учурунда жана 2010-жылы Апрель окуяларында «Ала-Тоо» аянтында курман болгондордун элесине арналган Эл эркиндиги үчүн монументке гүл коёт.
Белгилей кетсек, Роза Отунбаева менен Алмазбек Атамбаевдин алакасы 2016-жылы референдум алдында солгундаган. Убактылуу өкмөттүн мүчөлөрү Конституцияга өзгөртүүгө каршы чыгышкан. Роза Отунбаева президент Сооронбай Жээнбековдун инагурациясына дагы чакырылган эмес.
