Казак мушкери Бейбит Шуменов киши сабоого шектелүүдө
Астанадагы соода борборунда мушташка катышкан адам белгилүү казакстандык мушкер Бейбит Шуменов болгон. Бул маалыматты Казакстандын ички иштер министринин орун басары Кайрат Сунтаев тастыктады.
«Иш бейбаштык беренеси менен козголгон. Азырынча өтө оор эмес кылмыш бар, экспертиза көрсөтөт, күтүп жатабыз. Ал бокс менен көптөн бери алектенбейт, бирок экспертизаны күтөлү. Кызматтык текшерүү жүрүп жатат, ал катуу жазага тартылат», — деди Сунтаев өкмөттүн жыйынында.
Социалдык тармактарда тараган кадрларда мушкер баласын көтөрүп турган кишиге кол салган. ИИМ өкүлүнүн айтымында, бала жабыркаган эмес, бирок жабырлануучу тарап Шуменовду кылмыш жоопкерчилигине тартууну талап кылууда. Мушташ учурунда Шуменов соо болгон.
Бейбит Шуменов — казакстандык адискөй мушкер. Жеңил салмакта жана биринчи оор салмакта күч сынашып жүргөн. Ал мурдагы дүйнө чемпиону, туруктуу дүйнөнүн чемпиону жана WBA версиясы боюнча оор салмактагы дүйнөнүн убактылуу чемпиону.
