Орус өкмөтү студенттерди Мариуполду калыбына келтирүүгө жөнөтөт
Орус өкмөтү талкаланып, оккупацияланган Мариуполду калыбына келтирүүгө орусиялык студенттерди тартууну пландоодо. Бул тууралуу Орусиянын вице-премьер-министри Татьяна Голикова билдирди.
Аткаминердин айтымында, жайында орусиялык студенттер Мариуполдун инфраструктурасын калыбына келтирүүгө катышат.
«Ушул жай сиздер үчүн жаңы мүмкүнчүлүктөрдү ачат. Сиздер бардык милдеттерди аткарасыздар деп ишенем», — деди вице-премьер-министр.
Ал орусиялык студенттер Донецк облусундагы согуштук аракеттердин натыйжасында бузулган «Саур-Могила» мемориалдык комплексин калыбына келтирүүгө катышканын эске салды.
Мурдараак орусиялык компаниялар Украинанын аннексияланган облустарындагы аскердик курулуштарга борборазиялык мигранттарды байма-бай жалдап жатканы, арасында Кыргызстандын жарандары да бар экени тууралуу маалыматтар айтылып келген. Алардын айрымдары убада кылынган акчасын ала албай жатышканы кабарланган.
