Садыр Жапаров Жетим-Тоого байланыштуу кайрылуу жасады
Президент Садыр Жапаров Жетим-Тоонун айланасындагы талаш-талкууга байланыштуу элге кайрылуу жолдоп, ал жердеги кенди колдонууга каршы чыккандарды сындады. Ал жарандарды «Жетим-Тоону берип атышат деп калп сүйлөбөөгө» чакырып, тийиштүү органдарды жалган маалымат тараткандарды тартипке чакырууга үндөдү.
Мамлекет башчынын текст түрүндөгү кайрылуусу 14-августта Фейсбуктагы баракчасына жарыяланды.
«Эсиңиздерде болсо, президенттик шайлоодо «Эгер Жетим-Тоону 100 пайыз өзүбүз иштете турган болсок, сырткы карызыбызды Жетим-Тоо эле жаап коет» деп айткан сөзүм бар. Бирок азыр Жетим-Тоону иштетели деген эч ким жок», — деп белгилеген Жапаров «бүгүн эле Жетим-Тоону иштетип жиберүүгө даярдык жоктугун, геологиялык иштер жүргүзүлүп, запасын тактоо буйругу берилгенин» кошумчалады. Ал кенди Кыргызстан өзү иштете турганын, башкаларга үлүш берилбей турганын айтты.
