Мектептердин имаратынын коопсуздугу текшерилет
Өлкөдөгү мектептердин техникалык абалы жана коопсуздугу текшерилет. Бул тууралуу министрлер кабинетинин төрагасы Акылбек Жапаров тапшырма берди.
Министерлер кабинети Жалал-Абад облусунун Чаткал районундагы Терек-Сай айылындагы №18 орто мектептин имаратынын шыбы урап түшкөндүгүнө байланыштуу жыйын өткөрдү.
Акылбек Жапаров билим берүү мекемелеринин коопсуз иштешине жооптуу тиешелүү мамлекеттик органдардын ишин сынга алды.
Отурумдун жыйынтыгында министрлер кабинетинин төрагасы Акылбек Жапаров тиешелүү мамлекеттик органдарга Терек-Сай айылындагы №18 орто мектептин имаратында болгон окуянын себептерин аныктоону, ошондой эле Терек-Сай айылындагы бардык имараттарды, мындан сырткары республиканын бардык мектепке чейинки жана жалпы билим берүүчү мекемелеринин имараттарынын техникалык абалын текшерүүнү тапшырды.
