Мамлекеттик тил боюнча жаңы мыйзам Россиянын элчисин тынчсыздандырууда
Мамлекеттик тил боюнча жаңы мыйзам долбоору Кыргызстандагы орус тилдүү жарандардын мүмкүнчүлүктөрүн чектеп, орус тилинин ролун кыскартат. Бул тууралуу Россиянын Кыргызстандагы элчиси Николай Удовиченко өзүнүн социалдык тармактагы баракчасында билдирди.
Анын айтымында, элчилик тынчсыздануу менен тил тармагында сунушка көз салууда.
«Кызуу талкууга алынып жаткан "КРнын мамлекеттик тили жөнүндө" жаңы мыйзам долбоорун карап чыктым. Чындыгында, кооптонулар бар, орус тилинин орду жана колдонуу чөйрөсү кыскарып калышы мүмкүн. Азыркы жетишкендиктерден оңой эле баш тартып коюунун зарылчылдыгы барбы?", - дейт Николай Удовиченко.
Белгилей кетсек, Мамлекеттик тил боюнча Улуттук комиссия жаңы мыйзам долбоорун иштеп чыкты. Долбоор коомдук талкуудан өтүп, парламенттин кароосуна сунушталат.
