Элчилик Орусиядагы мигранттарды 30-сентябрга чейин каттоого турууга чакырды
Кыргызстандын Орусиядагы элчилиги кыргыз жарандарын 30-сентябрга чейин бардык документтерин тууралап алууга — миграциялык каттоого туруп, эмгек келишимин түзүүгө чакырды.
Дипломатиялык өкүлчүлүктүн маалыматына караганда, Орусия президентинин 16-июндагы жарлыгы менен мигранттарга документтерин ирээттеп алуу үчүн берилген мөөнөт 30-сентябрга чейин узартылган.
Апрелдин башында орус бийлиги Орусияда 115 миңден ашуун кыргызстандык жаран миграция эрежесин сактабай жүргөнүн эскерткен.
Расмий маалыматтарга караганда, ушу тапта Орусияда жашап-иштеп жүргөн кыргызстандыктардын саны 700 миңден (ред: расмий эмес маалыматтарда 1 миллиондон ашык) ашат. Административдик эреже бузуу жана миграциялык талаптарды сактабаганы үчүн 43 780 кыргыз жаранына Орусияга кирүүгө тыюу салынган.
