Осмонбек Артыкбаев Алмазбек Атамбаевге каршы көрсөтмө берди
Осмонбек Артыкбаев Алмазбек Атамбаевге каршы көрсөтмө берди. Бул тууралуу Укук тартиби, кылмыштуулук менен күрөш жана жемкорлукка каршы аракеттенүү боюнча комитеттин отурумунда айтылды.
Мурунку президент Алмазбек Атамбаевди кол тийбестиктен ажыратуу боюнча түзүлгөн атайын депутаттык комиссиянын корутундусунда Атамбаевдин Бишкек ЖЭБге көмүр алып келүүгө тийиштиги бар экени жазылган. Экс-президент «Прогресс компани» компаниясынын кызыкчылыгын көздөгөн.
Бул айыптоолор мурунку энергетика министри Осмонбек Артыкбаев көрсөтмө бергенден кийин анык болду. Комиссия экс-президентти оор кылмышка шектүү катары кароого негиз бар деп, укук коргоо органдары текшерүүгө болот деген бүтүмгө келишти.
Экс-президенттин кол тийбестиги тууралуу маселе парламентте алгач 2018-жылы Бишкек Жылуулук электр борборундагы (ЖЭБ) аварияга байланыштуу талкуу учурунда көтөрүлгөн. Депутат Масалиев ЖЭБди модернизациялоого буга чейинки бийликтин түздөн-түз тиешеси бар экенин айтып чыккан. Ошондон тартып бул демилге Алмазбек Атамбаевге каршы багытталган аракет катары бааланып, коомчулукта кызуу талкууга негиз болгон.
