Өкмөт башчы: Жазаларды катаалдаштыруу — жолдогу тартипти сактоого багытталган
Премьер-министр Мухаммедкалый Абылгазиев 1-январдан тарта күчүнө кирген айыппулдар боюнча пикирин билдирди. Өкмөттүн маалымат кызматы таркаткан кабарда жаңы кодекстерди жана мыйзамдарды ишке ашыруу маселеси боюнча атайын кеңешме өткөндүгү айтылат.
Кеңешменин жүрүшүндө өкмөт башчы, жол кыймылы эрежелерин бузгандыгы үчүн жазаны катаалдатуучу жаңычылдыктар коомчулукта ар-түрдүү реакцияны жараткандыгын белгиледи.
«Эгерде айрым ченемдер катаалдаштырылган болсо да, алар милдеттүү болуп саналат жана аларды өлкөнүн ар бир жараны аткарышы абзел. Жарандарыбыз жазадан эч кимдин кача албастыгын түшүнүүсү маанилүү», — деди Мухаммедкалый Абылгазиев.
Ошону менен бирге премьер-министр укук коргоо органдарынын кызматкерлери арасында коррупцияны ачыктоо жана жоюу боюнча активдүү иштер жүрүп жаткандыгын айтты.
