Салбуурун федерациясынын негиздөөчүсү президенттен колдоону күчөтүүнү суранды
Салбуурун федерациясынын негиздөөчүсү Алмазбек Акунов президент Садыр Жапаровго кайрылып, улуттук спортко жана аңчылык өнөрүнүн чеберлерине мамлекеттик колдоону күчөтүүнү өтүндү. Кайрылуу социалдык тармактарда жарыяланды.
Акуновдун айтымында, кыргызстандык спортчулар ири эл аралык мелдештерде байгелүү орундарды байма-бай ээлеп келет. Бирок бул багытка мамлекеттик колдоо дагы деле жетишсиз.
Ал өзгөчө бүркүт салуу өнөрүнө көңүл бурууга чакырды. Анын айтымында, Кыргызстан бул багытта Казакстан, Монголия жана араб өлкөлөрүнө салыштырмалуу колдоодон артта калууда.
Федерациянын негиздөөчүсү Кыргызстан менен Казакстандагы байге фонддорун да салыштырды. Анын айтымында, Казакстанда бүркүтчүлөрдүн мелдештеринде баш байгеге автоунаалар коюлуп, өлкөдө бүркүтчүлөрдүн саны 150дөн ашат. Ал эми Кыргызстанда Дүйнөлүк көчмөндөр оюндарында жеңүүчүлөргө 50 миң, 40 миң жана 30 миң сомдон сыйлык берилген.
Буга чейин Жогорку Кеңештин депутаты Салтанат Аманова да Салбуурун федерациясын мамлекеттик жактан колдоо маселесин көтөргөн. 2026-жылга федерацияга 11 миллион сом каралган, бирок бул каражат мелдештерди өткөрүүгө гана багытталган.
Депутат бүркүттөрдү, тайгандарды жана жылкыларды багууга да кошумча каражат керек экенин белгилеген.
