Ташиев «Альфа» атайын кызматынын түзүлгөндүгүнүн 32 жылдыгы менен куттуктады
Улуттук коопсуздук боюнча мамлекеттик комитеттин жетекчиси Камчыбек Ташиев «Альфа» атайын кызматынын жоокерлерин аталган кызматтын түзүлгөндүгүнүн 32 жылдыгы менен куттуктады.
Ал бир күн мурун, 27-октябрда Баткен, Ош жана Жалал-Абад облустарындагы аскер кызматкерлерин куттуктоо аземине катышты. Иш-чара УКМКнын Ош облусу боюнча башкармалыгында болгонун Камчыбек Ташиевдин жардамчысы Өткүрбек Рахманов Фейсбук баракчасына билдирди.
Улуттук коопсуздук боюнча мамлекеттик комитеттин башчысы өз сөзүндө «Альфа» атайын бөлүгү улуттук коопсуздукту камсыз кылууда маанилүү роль ойноорун жана анда кызмат өтөө аскер кызматкерлери үчүн өзгөчө сыймык экенин белгиледи.
«Урматтуу УКМКнын «Альфа» атайын кызматынын кызматкерлери жана ардагерлери, сиздерди кесиптик майрамыңыздар менен куттуктайм! Сиздин эрдигиңиз, ишке берилгендигиңиз жана жогорку кесипкөйлүгүңүз — өлкөбүздүн коопсуздугунун ачкычы. Сиз жарандарды жана мамлекеттин кызыкчылыгын коргоого ар дайым даяр чыныгы баатырларсыз. Ишиңиздер ар дайым татыктуу ийгиликтерди алып келсин, үйүңүздөрдө тынчтык жана бакубатчылык өкүм сүрсүн! Сиздерге чың ден соолук, ийгиликтерди жана Мекенибиздин жыргалчылыгы үчүн кызматыңызда жаңы ийгиликтерди каалайм!». — деди ал.
Эске салсак, 1992-жылдын 27-октябрында УКМКнын «Альфа» атайын кызматы түзүлүп, ал бүгүнкү күндө атайын операцияларды жүргүзүп жаткан элиталык бөлүм болуп саналат.
