Бишкек ШИИБдин кызматкерлери 27 кг марихуана жана баңги зат саткандарды кармады
ИИМдин Баңгизаттарды мыйзамсыз жүгүртүүгө каршы күрөшүү кызматкерлери баңги затын сатууга шектелип 37 жаштагы эркек жана аялды кармашканын Бишкек шаардык ички иштер башкы башкармалыгынын басма сөз кызматы билдирди.
Маалыматка ылайык, 3-сентябрда Ленин райондук ички иштер башкармалыгында жаран гашиш баңгизатын укук коргоо кызматкерлерине өз ыктыяры менен тапшырган. Аталган факты боюнча КРнын Кылмыш-жаза кодексинин «Баңгизаттарды, психотроптук заттарды жана алардын аналогдорун сатуу максатында мыйзамсыз даярдоо» беренеси боюнча иш козголгон.
БШИИБнын ыкчам кызматкерлери бул баңги заттарды саткандарды жана алар сакталган үйдү аныкташкан.
Андан ары Чүй облусунун Аламүдүн районунун Баш-Кара-Суу айылында жайгашкан үйлөрдүн биринде кылмышка шектүү катары 37 жаштагы Б.Т. жана А.Н., Бишкек ШИИБнин убактылуу кармоочу жайына киргизилген. Укук коргоо кызматкерлери алардын үйүн тинтүү учурунда 1150 кап кара куурайдын саманын табышкан. Мындан тышкары, кылмышка шектүүнүн муздаткычынан жана сумкасынан баңгизат да табылган. Жалпы салмагы 26 килограмм 907 граммды түзгөн. Шектүү ар бир кап кара куурайды 2 миң сомдон саткандыгы менен түшүндүргөн. Дары-дармектердин жалпы баасы алдын ала маалыматтар боюнча 2 миллион 500 миң сомду түздү.
