2025-жылы бюджеттин профицити кайда жумшалат? Каржы министрлигинен жообу
Кыргызстандын 2025-жылдагы республикалык бюджетинин 26,1 миллиард сомду түзгөн профицити бир нече негизги долбоорлорго жумшалды. Бул тууралуу республикалык бюджет жөнүндө мыйзамды талкуулоодо Каржы министрлигинин бюджеттик саясат бөлүмүнүн башчысы Айдарбек уулу Талас билдирди.
Анын айтымында, каражаттын негизги бөлүгү финансылык активдер менен операцияларга жана өлкөнүн тышкы карызын жабууга жумшалат. Ашыкча каражаттын бир бөлүгү «Кытай-Кыргызстан-Өзбекстан» компаниясынын темир жол куруучу уставдык капиталына, Камбар-Ата ГЭС-1ди курууга жана «Айыл Банк» менен «Элдик Банктын» уставдык капиталын толуктоого жумшалат.
Кошумчалай кетсек, Каржы министрлиги алдыдагы беш жылдыктын бюджеттик планын сунуштаган. Ага ылайык, жыл сайын республика профицитке чыгат. 2024-жылдын башынан бери ал 30,6 млрд сомду түздү. Ошол эле учурда Евразия өнүктүрүү банкы жылдын аягына чейин профициттин 1 пайызга азайышын болжолдоодо.
