Кыргызстан Азербайжандан мунайзат сатып алабы?
Кыргызстан Азербайжандан мунай алууну көздөп жатат. Бул тууралуу Баку шаарында эки өлкөнүн энергетика министрлеринин жолугушуусунда талкууланды.
Азербайжан менен Кыргыз Республикасынын Энергетика министрлигинин жетекчилери жолугушуу өткөрүп, анда мунай жеткирүү боюнча келишим түзүү маселеси көтөрүлдү. Тараптар энергетикалык кызматташуунун башка маселелерин да талкуулашты.
Мындай сунушту Кыргызстандын Энергетика министрлигинин башчысы Таалайбек Ибраев киргизди. Түрк мамлекеттер уюмунун 4-жыйынынын алкагында Парвиз Шахбазов менен эки тараптуу жолугушуу болду.
КР Энергетика министрлигинин башчысы Азербайжандын мунай кендерин иштетүү жана мунай продуктуларын өндүрүү жаатындагы тажрыйбасынын жогорку деңгээлин белгиледи. Азербайжан Кыргызстанда гидроэнергетика жана энергиянын кайра жаралуучу булактары тармагындагы долбоорлорго катышууга чакырылды. Ошондой эле, Азербайжан-Кыргыз өнүктүрүү фондунан 2 миллион доллар өлчөмүндө жеңилдетилген каржылоо аркылуу Кыргыз Республикасында электромобилдер үчүн заряддагычтарды сатып алуу жана орнотуу мүмкүнчүлүгүн кароо сунушу айтылды.
Азербайжан тарап кызматташууга даяр экенин билдирип, мунай менен камсыздоо маселелерин талкуулай турган атайын жумушчу топ түзүүнү сунуштады.
