«Асман» авиакомпаниясы 27-сентябрда Бишкектен Ошко алгачкы каттамын ачат
«Асман» авиакомпаниясы Бишкектен Ошко алгачкы каттамына даярданууда. Алгачкы каттам 27-сентябрда ишке ашат. Бул тууралуу аталган ишкананын башкы директору Жолдошбек Айдаралиев билдирди.
Asman Airlines авиакомпаниясы 2023-жылы негизделген. Бул убакыттын ичинде ал өз командасын даярдап, кызматкерлерди окутууга жетишкен. 80 орунга эсептелген биринчи Q400 учагы өлкөгө август айында келет, дагы бири сентябрда күтүлүүдө. Ноябрга чейин компания үчүнчү учак сатып алууну пландаштырууда.
Анын учкучтарын канадалык адистер, ал эми стюарддарын Россия Федерациясынын аймактарында ийгиликтүү учуп жүргөн россиялык «Аврора» авиакомпаниясы даярдайт.
Asman Airlines авиакомпаниясы ошондой эле жаңы учуу форматын киргизди. Анда учактар үч бурчтуу түрдө уча турган — бир шаардан экинчисине аралык конуу менен Кыргызстандын бардык 11 аэропортун тейлейт.
Мындай ыкма билеттердин баасын төмөндөтүп, авиакаттамдарды жеткиликтүү кылмакчы.
Кошумчалай кетсек, Asman Airlines 2026-жылы эл аралык рынокко чыгууга жаңы учактар менен толуктоону пландоодо.
