Париж-2024: Мунарбек Сейитбек уулу финалга чыкты
Бүгүн, 9-августта кыргызстандык мушкер Мунарбек Сейитбек уулу Париж олимпиадасынын финалына чыкты.
Ал жарым финалда атаандашы болгариялык Хавьер Ибаньес Диаз менен күч сынашып, 4:1 эсебинде жеңип алды. Эми Мунарбек Сейитбек уулу алтын медаль үчүн беттешет.
Буга чейин Мунарбек Сейитбек уулу 57 килограмм салмакта 1/8 финалда кубалык Орта Родригес Дель Рей Сайдель Иванды жеңип, чейрек финалга өткөн. Кийинки баскычта америкалык спортчу Жамал Харвини утуп, жарым финалга чыккан.
Кыргызстандык мушкер финалда өзбекстандык Абдумалик Халоков менен беттешет.
Финалдык беттеш 11-августта болот.
Белгилей кетсек, Мунарбек Сейитбек уулу Кыргызстандын беш жолку чемпиону, студенттер аралык Дүйнө чемпионатында коло медаль тагынган, Дүйнө чемпионатынын коло байгесинин ээси, Азия чемпионатында коло медаль уткан.
