Кыргызстандын министрликтеринин ишине баа берилди. Эки министрлик «2» алды
Министрлер кабинети үстүбүздөгү жылдын биринчи жарым жылдыгынын иш планынын аткарылышынын жыйынтыгын чыгарды. Бул тууралуу минкабдын басма сөз кызматы билдирди.
Маалыматка ылайык, мамлекеттик органдарга, президенттин облустардагы ыйгарым укуктуу өкүлдөрүнө, Бишкек жана Ош шаарларынын мэрияларына баа берилди.
Министрлер кабинетинин маалыматы боюнча Айыл чарба министрлиги, Жаратылыш ресурстары министрлиги, Тышкы иштер министрлиги жана башка төрт ведомство мыкты иштешти. Ал эми Саламаттыкты сактоо министрлиги, Маданият министрликтери жана өлкө башчынын Талас, Баткен облустарындагы ыйгарым укуктуу өкүлчүлүктөрү канааттандырарлык эмес көрсөткүчтөргө ээ.
Министрлер Кабинетинин иш-планынын аткарылышынын даражасын баалоо методикасын киргизүү стратегиялык жана масштабдуу документтерди ишке ашырууда министрликтер менен ведомстволордун ведомстволор аралык өз ара аракеттенүүсүн кыйла күчөтүп, алардын жоопкерчилигин жогорулатканы белгиленген.
Кийинки баалоо 2024-жылдын декабрында жүргүзүлөт.
