Күндүн сүрөтү. Бишкек мэри жана орун басары жумушка автобус менен келишти
Бишкек шаарынын мэри Айбек Жунушалиев жана орун басары Жамалбек Ырсалиев жумушка автобус менен келишти. Бул тууралуу вице-мэр социалдык тармактарда билдирди.
«Бүгүн бейшемби. Мэрдин демилгеси менен ар бир шейшемби жана бейшемби күндөрү коомдук транспортто иштейбиз. Максат — элдин көйгөйүн көрүп, жеринде чечүү», — деп жазды вице-мэр.
Эскерте кетсек, буга чейин Айбек Жунушалиев шейшемби жана бейшемби күндөрү кол алдындагыларга жеке унааларды колдонууга тыюу салган. Алар жумушка жана үйгө жетүү үчүн коомдук транспортту колдонушу керек эле.
24.kg сайтынын мэр өзү коомдук транспортту колдонобу деген суроосуна ал жөө жүрөм деп жооп берди. Ал эми шейшемби, бейшемби күндөрү жашаган жерине баруу керек болсо No56 жана 55-автобустар менен жүрөт.«Мен үчүн ар бир сапар жарандарды жеке кабыл алуу менен да коштолот. Ким билип калса, келип, суроолорду берет», — деди ал.
