Ноокаттагы табигый кырсык. БУУнун баш катчысы көңүл айтты
БУУнун баш катчысы Антониу Гутерриш Ош облусунун Ноокат районунда болгон селге байланыштуу көңүл айтты. Бул тууралуу ал бүгүн, 2-июлда Чолпон-Атадагы мамлекеттик резиденцияда президент Садыр Жапаров менен болгон жолугушууда билдирди.
"Бул көптөгөн адамдардын өлүмүнө алып келген коркунучтуу табигый кырсык. Жүрөгүм ооруйт. Биз силер мененбиз. Биз сизди колдойбуз",-деди Антониу Гутерриш.
Белгилей кетсек, 28-июнь күнү Ош облусунун Ноокат районунда сел жүрүп, адамдардын өмүрү кыйылган. Нөшөрлөп жааган жамгырдан улам сел ондогон короолорду каптап, көпүрөлөрдү, жолдорду, электр зымдарын жарактан чыгарган. Аймакта өзгөчө кырдаал жарыяланды.
30-июнда Ош облусунун Кара-Кулжа районунда сел жүрүп, төрт адам каза болду. Алардын баары бир үй-бүлөнүн мүчөлөрү. Каза болгондордун жалпы саны бүгүнкү күндө он адамга жетти.
