Газада дайынсыз жоголгон балдардын саны 21 миңге жетиши мүмкүн
«Балдарды коргоо» гуманитардык жардам уюмунун маалыматына караганда, Газа тилкесинде Израил менен ХАМАСтын ортосундагы согуштан улам дайынсыз жоголгон же үй-бүлөсүнөн ажыраган балдардын саны 21 миңге жетиши мүмкүн.
БУУнун маалыматына караганда 1953-жылдан бери аймактагы палестиналык балдарга колдоо көрсөтүп келе жаткан бул уюм 17 миң ата-энесинен ажырагын жана дагы 4 миңдей бала урандылардын астында калышы мүмкүн деп билдирген.
«Дайынсыз жоголгон, бирок тирүү балдар, олуттуу тобокелчиликтерге туш болушууда жана алар табылышы керек. Аларды коргоп, үй-бүлөлөрү менен бириктирүү керек. Өлтүрүлгөн балдар үчүн — алардын өлүмү расмий белгиленип, алардын үй-бүлөсүнө маалымдалып, акыркы сапарга узатуу ырым-жырымдары болушу керек», — деди «Балдарды коргоо» уюмунун Жакынкы Чыгыш боюнча аймактык директору Жереми Стонер.
БУУнун Адам укуктары боюнча Жогорку комиссарынын кеңсесинин маалыматына караганда, 2023-жылдын 7-октябрында согуш башталгандан бери Газа тилкесинде 15 миңдей бала набыт болду.
