Ош шаарында өзгөчө кырдаал режими киргизилди
18-май күнү сел кесепеттерин жөнгө салганга чейин жана жаз-жай мезгилиндеги туруксуз аба-ырайына байланыштуу Ош шаарында өзгөчө кырдаал режими киргизилди. Бул тууралуу мэр Бакытбек Жетигеновдун төрагалыгы алдында өткөн Жарандык коргонуу штабынын жыйынында жарыяланды.
Ош шаарынын жарандык коргонуу кызматтарынын, шаардык жана муниципалдык мекемелер менен уюмдардын, муниципалдык аймактардын жана айылдардын аймактык башкармалыктарынын жетекчилерине селдин кесепеттерин жоюу жана комплекстүү иш-чараларды жүргүзүү, анын ичинде суу каптаган аймактарды тазалоо, бузулган каналдарды жана тосмолорду калыбына келтирүү, алдын алуу иш-чараларын күчөтүү, шаардык ирригациялык тармактардын жана суу чыгаруучу каналдардын абалын көзөмөлдөө тапшырылды.
Өзгөчө кырдаалдар министрлигинин маалыматы боюнча, 18-майда Ош облусунда сел жүргөн.
