Ошто мыйзамсыз иштеп жаткан майнинг-фермалар аныкталды
Ош облусунда бир нече майнинг-ферма аныкталды. Бул тууралуу Улуттук коопсуздук мамлекеттик комитетинен билдиришти.
«Энергетика тармагындагы коррупцияны жана өлкөдөгү электр энергиясынын олуттуу тартыштыгын жоюу максатында жүргүзүлүп жаткан иштердин алкагында Ош облусунун Кара-Суу жана Ноокат райондорунун аймагындагы майнинг-фермалардын мыйзамсыз иштери аныкталып, бөгөт коюлду. Майнинг-фермалардын иштерин уюштуруу үчүн колдонулган 900дөн ашык жабдуу алынды», — деп билдирди мекеме.
Кылмыш-жаза кодексинин «Кызмат абалынан кыянаттык менен пайдалануу» беренеси боюнча кылмыш иши козголду. УКМК майнинг-фермалардын ээлери Кыргызстандын «Виртуалдык активдер жөнүндө» мыйзамын бузуп, расмий каттоосуз жана милдеттүү сертификаты жок, катталуу жана башка төлөм-жыйымдарды төлөбөй туруп криптовалюта өндүрүшүн уюштурганын белгиледи.
Учурда бул ишке тиешеси бар бардык адамдарды, ошондой эле мамлекетке келтирилген зыянды аныктоо боюнча тиешелүү тергөө-ыкчам иштери жүрүп жатат.
