Кыргызстан менен Кытай жаңы өткөрүү пунктун ачуу үчүн талаа иштерин баштады
Кыргызстан менен Кытай биргелешип жаңы «Бедел» өткөрүү пунктун ачуу үчүн талаа иштерин баштады. Бул тууралуу министрлер кабинетинин басма сөз кызматы билдирди.
Министрлер кабинетинин төрагасынын орун басары — суу ресурстары, айыл чарба жана кайра иштетүү өнөр жай министри Бакыт Төрөбаев тиешелүү мамлекеттик органдардын жана кызматтардын өкүлдөрүнүн катышуусунда жеринде мекемелер аралык кеңешме өткөрүп, анда Ысык-Көл облусундагы кыргыз-кытай мамлекеттик чек арасындагы «Бедел» көзөмөл-өткөрүү пунктунун ачылышына байланыштуу маселелерди талкуулады.
«Жумушчу топ көзөмөл-өткөрүү пунктунун алдын ала жайгашкан жерлерин, ошондой эле чек ара жана бажы көзөмөлүнүн объектилерин карап чыкты. Мындан тышкары, Барскоон-Учтурфан-Аксуу автожолунун курулушунун маршруту жана бул объектилердин толук кандуу иштеши үчүн тийиштүү инфраструктураны куруу маселелери талкууланды», — деп айтылат маалыматта.
2023-жылдын май айында президент Садыр Жапаровдун Кытайга болгон иш сапарынын алкагында Кыргызстан менен Кытайдын ортосундагы жаңы «Бедел» өткөрмө пунктун ачуу боюнча макулдашууга жетишилген.
