Кыргызстанда жер көчкү коркунучу жогору 4,5 миңден ашуун аймак бар
Кыргызстанда жер көчкү түшүү коркунучу жогору 4 миң 557 участок бар. Анын 1 миң 180ден ашууну калктуу конуштарга коркунуч жаратат.
Бул тууралуу өзгөчө кырдаалдар министри Бообек Ажикеев «Биринчи радиодогу» маегинде билдирди. Министрдин айтымында, 3 миң 442 сел жүрүү кооптуулугу бар участоктун 1 миң 273ү эл жашаган аймактарга туура келет.
Табигый жана техногендик кырсыктардын алдын алуу, кесепеттерин жоюу ишине токтолгон Ажикеев соңку 3 жылда 700дөн ашуун атайы техника жана 3 тик учак алынганын кошумчалады.
10-11-майда нөшөрлөп жааган жаандан улам, Жалал-Абад облусунун айрым аймактарында сел жүргөн. Дарыяларда жана сайларда суунун деңгээли көтөрүлүп, автоунаа жолдорго кум-шагыл толуп калган. ӨКМ учурда селдин кесепеттерин жоюу иштери жүрүп жатканын маалымдады.
