Улуттук кардиология борборуна заманбап жабдуулар тапшырылды
Министрлер кабинетинин төрагасы Акылбек Жапаров академик Мирсаид Миррахимов атындагы Улуттук кардиология жана терапия борборуна жүрөк-кан тамыр ооруларын диагностикалоо жана дарылоо үчүн сатып алынган заманбап жабдууларды тапшырды. Бул тууралуу министрлер кабинетинин басма сөз кызматы билдирди.
Борборго эл аралык стандарттарга жооп берген «Азурион 7» ангиографиялык аппараты орнотулду. Жалпы суммасы 1,5 миллион долларды түзгөн бул долбоор Бүткүл дүйнөлүк банк тарабынан каржыланган.
Белгилей кетсек, Улуттук кардиология жана терапия борборунда медициналык жардамдын жеткиликтүүлүгүн камсыздоо жана сапатын жогорулатуу максатында «Тез жардам кардиология» программасы да ишке ашырулууда.
Ошондой эле Кытай, Россия жана Казакстандын алдыңкы дарыгерлери келип, алардын жүрөк-кан тамыр оорулары менен ооруган жарандарга уникалдуу операцияларды жасаары пландалууда.
Акылбек Жапаров статистикалык маалыматтар боюнча, өлкөдө жүрөк-кан тамыр ооруларынан каза болгондордун саны жогору болуп жатканын, ошол себептүү заманбап технологияларды жана инновацияларды киргизүү менен медицина тармагын өнүктүрүү мамлекеттин негизги артыкчылыктарынын бири экенин билдирди.
