Энергетика министрлиги жарыкты чектөө токтотулганын билдирди
Кыргызстандын Энергетика министрлиги 8-марттан баштап жарык өчүрүү токтотулганын билдирди. Маалыматта аба ырайы ысып, электр энергиясын керектөө кыйла азайгандыктан, жөнгө салуу иш-чаралары жыйынтыкталганы жазылган.
Расмий эсепте ушул күндөрү электр энергиясын керектөөнүн орточо суткалык көрсөткүчү 61 миллион 117 миң киловатт саатты түзүүдө. Күн суук кезде ал 70 миллион киловатт саатка чейин жеткен.
Марттын башында Кыргызстанда эки негизги ГЭСти реконструкциялоого байланыштуу жарык өчүрүлө баштаган. Бул жагдай карапайым калкка түйшүк жаратып, нааразылыктарга себеп болгон.
Расмий маалыматка ылайык, Токтогул суу сактагычында учурда 7,5 миллиард метр кубдан бир аз ашуун суу бар. Адистер суунун көлөмү 6,5 миллиард метр кубга түшкөндө ГЭСтин иши токтой турганын эскерткен.
