Кыргызстанда 144 күрөөкананын лицензиясы убактылуу токтотулду
Кыргызстанда 144 күрөөкананын лицензиясы убактылуу токтотулду. Бул тууралуу Жогорку Кеңештин жыйынында Финансы рыногун жөнгө салуу жана көзөмөлдөө мамлекеттик кызматынын төрагасы Марат Пирназаров билдирди.
Анын айтымында, ломбарддарды текшерүүгө мораторий киргизилген. Быйыл ал узартылды.
«Бирок буга карабастан келип түшкөн арыздардын негизинде иш-чаралар жүргүзүлүп, анын жыйынтыгында ломбарддарга айып пул салынды. Мындан тышкары, 144 ломбарддын лицензиясы токтотулуп, 10 күрөөкананыкы жокко чыгарылды. Ошондой эле ломбарддарга жазма буйруктар берилип жатат», — деп белгиледи ал.
Марат Пирназаров ломбарддар ишкердиктин бир түрү экенин белгилеп, ишкерлерди текшерүүгө мораторий киргизилгенде ломбарддар да бул нормага кирерин билдирди.
Экономика жана коммерция министри Данияр Амангелдиев кыргызстандыктар көбүнчө күрөөгө транспорт, тиричилик техникасын, смартофондор жана зер буюмдарды коюшарын айтты.
Финансы рыногун жөнгө салуу жана көзөмөлдөө кызматынын маалыматы боюнча, ломбарддардын негизги бөлүгү Бишкек, Ысык-Көл жана Чүй облустарында, Ош шаарында жайгашкан. Эң аз Баткен облусунда катталган.
