Актёр Ален Делондун үйүнөн катталбаган курал-жарактар табылды
Франциянын полициясы белгилүү киноактёр Ален Делондун үйүнөн катталбаган 72 ок атуучу курал тапты.
Актёрдун ал курал-жарактарга тиешелүү документтери жана аларды алып жүрүүгө уруксаты болгон эмес.
Мындан тышкары актёрдун Париж шаарынын жака белиндеги үйүнөн 3 миңден ашык ок-дары жана жеке ок атуу жайы (тир) табылган.
Тинтүү иштери сот тарабынан дайындалган аткаминер Делондун үйүнө барып, ал жерде турган тапанчаны байкап калгандан кийин башталган. Тинтүү маалында табылган бардык курал-жарактар менен ок-дарылар конфискацияланды.
88 жаштагы Ален Делон француз киносунун ХХ кылымдагы эң популярдуу актёрлорунун бири. Ал 2019-жылы инсульт болуп, саламаттыгы толук калыбына келе элек. Актёр акыркы жолу эл алдына 2021-жылы, кесиптеши жана досу Жан-Поль-Бельмандонун тажыясына барганда чыккан.
