Жазгы талаа иштерин өз убагында жана сапаттуу өткөрүү максатында Мамлекеттик материалдык резервдер фонду дыйкандарга 10 миң тоннага чейин дизель майын 65 сомдон жеңилдетилген баада берет. Бул тууралуу Суу чарба, айыл чарба жана кайра иштетүү өнөр жай министрлиги билдирди.

Ведомстводон белгилешкендей, дыйкандарга айыл чарба өсүмдүктөрүнөн жана мөмө-жемиштерден жогорку түшүм берүүчү сортторду өстүрүү сунушталат.

Ошондой эле жазгы талаа иштерин жүргүзүү үчүн 42,2 миң тонна дизель майы жана 12 миң тонна бензин талап кылынарын да айта кетели. Бүгүнкү күндө күйүүчү-майлоочу майлар менен камсыздоодо көйгөй жок.

Нефтетрейдерлер ассоциациясынын маалыматы боюнча, нефтебазаларда жана май куюучу жайларда дизель майы жана бензин жетиштүү.

Мындан тышкары, Айыл чарба министрлиги пайдаланылбай жаткан айдоо жерлеринин аянты 3,3 миң гектарга азайып, 35,7 миңге чейин азаят деп билдирди. Башкача айтканда, 2025-жылы жалпы айдоо аянты 1 миллион 250 миң гектарды түзүп, былтыркыдан 3,3 миңге көп.