Эмомали Рахмондун Кыргызстанга болгон иш сапарында чек ара келишимине кол коюлат
Тажикстандын президенти Эмомали Рахмондун 12-мартта Кыргызстанга болгон мамлекеттик сапарынын алкагында чек ара боюнча келишимге жана башка эки тараптуу документтерге кол коюлат. Бул тууралуу Кыргызстандын президентинин администрациясынын тышкы саясат бөлүмүнүн башчысы Муратбек Азымбакиев билдирди.
Анын айтымында, иш сапарынын алкагында салтанаттуу иш-чаралар, КР президенти Садыр Жапаров, Жогорку Кеңештин төрагасы Нурланбек Тургунбек уулу жана министрлер кабинетинин төрагасы Адылбек Касымалиев менен эки тараптуу жолугушуулар пландалууда.
Ошондой эле Садыр Жапаров менен Эмомали Рахмондун биргелешкен билдирүүсүн кабыл алуу пландалууда.
Тажикстандын президентинин Кыргызстанга мамлекеттик сапары 12-13-мартта болот.
Эске салсак, 21-февралда Бишкекте кыргыз-тажик чек арасын делимитациялоо боюнча өкмөттүк делегациялардын сүйлөшүүлөрүнүн жыйынтыгында келишимге кол коюлган. 27-февралда Жогорку Кеңештин алты комитети Кыргызстан менен Тажикстандын ортосундагы мамлекеттик чек ара боюнча келишимди ратификациялоону карап, жактырды.
