Кыргызстандын 960 айылынын тургундары ичүүчү таза сууга муктаж
Бүгүнкү күндө Кыргызстандагы 2014 айылдын 796сы гана таза суу менен камсыз болгон. Бул тууралуу 24.kg басылмасына Ичүүчү суу менен камсыздоону жана канализацияны өнүктүрүү мамлекеттик мекемеси билдирди.
Ошол эле учурда акыркы үч жылда 114 айылда таза суу системалары калыбына келтирилип, ишке киргизилсе, учурда дагы 258 айылда курулуш иштери жүрүп жатат.
Ошентип, Кыргызстандын 960 калктуу конушунда суу түтүктөрүн куруу жана реабилитациялоо дагы эле талап кылынат. Мамлекеттик мекеменин маалыматы боюнча, бул максаттар үчүн болжол менен 1 миллиард доллар керектелет.
Маалым болгондой, бул маселени чечүү максатында инвестициялык план түзүлүп, Азия өнүктүрүү банкы, Азия инфраструктуралык инвестиция банкы, Ислам өнүктүрүү банкы, Сауд өнүктүрүү фонду, Евразия турукташтыруу жана өнүктүрүү банкы, Кувейттин Араб экономикасын өнүктүрүү фонду жана башка донорлор менен сүйлөшүүлөр жүрүп жатат.
